Sunday, August 21, 2016

സൗഹൃദത്തിന്റെ പാലങ്ങളാകുക

ദോഹ:ഭാരതം പോലെയുള്ള വൈവിധ്യ സം‌സ്‌കാരങ്ങളുള്ള രാജ്യത്ത്‌ എല്ലാ ആഘോഷ വേളകളും പരസ്‌പര സാഹോദര്യവും സൗഹൃദവും ഊട്ടിയുറപ്പിക്കാള്ള അവസരങ്ങളായി പ്രയോജനപ്പെടുത്താന്‍ സാധിക്കണം.എങ്കില്‍ മാത്രമേ ആഘോഷങ്ങളുടെ ഗരിമയും പൊലിമയും വര്‍‌ദ്ധിക്കുകുകയുള്ളൂ.അതു വഴിയാണ്‌ സമൂഹങ്ങള്‍ തമ്മില്‍ സുദൃഢമായ പാലം രൂപപ്പെടുകയും ഉള്ളൂ.അസീസ്‌ മഞ്ഞിയില്‍ പറഞ്ഞു.കള്‍‌ച്ചറല്‍ ഫോറം ആസ്ഥാനത്ത്‌ വിളിച്ചു ചേര്‍‌ക്കപ്പെട്ട മണലൂര്‍ കള്‍‌ച്ചറല്‍ ഫോറം പ്രത്യേക യോഗത്തില്‍ അധ്യക്ഷത വഹിച്ച്‌ സം‌സാരിക്കുകയായിരുന്നു അസീസ്‌.ഫോറം ജില്ലാ സംസ്ഥന നേതാക്കളുടെ സാന്നിധ്യത്തില്‍ നടന്ന യോഗത്തില്‍ വരാനിരിക്കുന്ന ഓണാഘോഷത്തെ അവിസ്‌മരണീയമാക്കാനുതകുന്ന ചര്‍‌ച്ചകള്‍ കൊണ്ട്‌ ധന്യമായി.അഡ്വ.മുഈനുദ്ധീന്‍,അബ്‌ദുല്‍ കലാം ആര്‍.വി,അലി ഹസന്‍,ഫൈസല്‍ എം.ബി,ഷംസീര്‍,അനീസ്‌ റഹ്‌മാന്‍,മര്‍സൂഖ്‌ സെയ്‌തു മുഹമ്മദ്‌ എന്നിവര്‍ ചര്‍‌ച്ചയെ സജീവമാക്കി.

ജാതി മത വര്‍‌ണ്ണ വെറിയുടെ നീരാളിപ്പിടുത്തത്തില്‍ നിന്നും രാജ്യത്തെ മോചിപ്പിച്ചെടുക്കാനുള്ള കാല്‍വെപ്പുകള്‍ മനുഷ്യ സ്നേഹികളുടെ ഭാഗത്ത് നിന്നും ഉണ്ടാകേണ്ടിയിരിക്കുന്നു.സമൂഹത്തില്‍ വൈരവും ശത്രുതയും അസഹിഷ്ണുതയും ഊഹിക്കാവുന്നതിലും ഉയരത്തില്‍ വാപൊളിച്ചു നില്‍‌ക്കുകയാണ്‌.ഇത്തരുണത്തില്‍ പരസ്‌പരം പഴിചാരി പ്രസ്‌താവനകളും ആരോഗ്യകരമല്ലാത്ത സം‌വാദങ്ങളും ഒരു സം‌സ്‌കൃത സമൂഹത്തിനു ഭൂഷണമല്ല.രാജ്യത്തെ എല്ലാ സമൂഹങ്ങളിലും ബഹു ഭുരിപക്ഷം പേരും പോരും പോര്‍ക്കളവുമായി പൊരുത്തപ്പെടുന്നവരല്ല.മറിച്ച്‌ ശാന്തിയും സമാധാനവും ആഗ്രഹിക്കുന്നവരാണ്‌.പഴങ്കഥകള്‍ ഉരുവിട്ട്‌ അഭിരമിക്കുന്നതിനു പകരം ക്രിയാത്മകമായി കളത്തിലിറങ്ങി കോലം കെട്ട കാലത്തിന്റെ ജീര്‍‌ണ്ണിച്ച ഭാവം മാറ്റിയെടുക്കാന്‍ പരിശ്രമിക്കണം.ഇതിനു കഴിയുന്ന ഏതു അവസരവും ഉപയോഗപ്പെടുത്താനുള്ള ബോധപൂര്‍വ്വമായ കര്‍മ്മങ്ങളില്‍ ജാഗരൂകരാകുകയും വേണം.യോഗം വിലയിരുത്തി.

വരാനിരിക്കുന്ന ഓണാഘോഷവുമായി ബന്ധപ്പെട്ട്‌ സംഘടിപ്പിക്കാനിരിക്കുന്ന സുഹൃദ്‌ സം‌ഗമത്തിന്റെ കാര്യ ദര്‍‌ശിയായി ഫൈസല്‍ എം.ബിയെ യോഗം ഉത്തരവാദപ്പെടുത്തി.രണ്ടാഴ്‌ചയ്‌ക്ക്‌ ശേഷം അടുത്ത സിറ്റിങ് നടത്താമെന്ന തീരുമാനത്തോടെ യോഗം സമാപിച്ചു.