Tuesday, August 14, 2018

ഇരകളുടെ സം‌ഗമം

ദോഹ:ജനാധിപത്യ വിരുദ്ധവും നീതി നിഷേധ പരവുമായി ഇരകളാക്കപ്പെട്ടവര്‍‌ക്ക്‌ വേണ്ടി തികച്ചും ജനാധിപത്യപരമായും നീതി യുക്തമായും ഇടപെടാതിരിക്കാന്‍ ധാര്‍‌മ്മിക ബോധമുള്ള ഒരു രാഷ്‌ട്രീയ സം‌വിധാനത്തിനും സാധ്യമല്ല.ഷം‌സീര്‍ ഹസ്സന്‍ പറഞ്ഞു.തൃശുര്‍ ജില്ലയില്‍ ദേശീയ പാത വികസനവുമായി ബന്ധപ്പെട്ട്‌ അന്യായമായി കുടിയിറക്കപ്പെട്ട ഇരകളുടെ സം‌ഗമത്തില്‍ അധ്യക്ഷ പ്രസം‌ഗം നടത്തുകയായിരുന്നു ജില്ലാ പ്രസിഡന്റ്‌ ശ്രീ ഷം‌സീര്‍ ഹസ്സന്‍.സാധാരണക്കാരന്റെ പ്രാഥമികമായ അവകാശങ്ങള്‍ പോലും ബി.ഒ.ടി മുതലാളിമാരുടെ ഇം‌ഗിതത്തിനുമേല്‍ തച്ചു തകര്‍‌ക്കപ്പെടുന്നതിന്നെതിരെ ദേശീയാടിസ്ഥാനത്തില്‍ തന്നെ നയ  നിലപാടുകള്‍ സ്വീകരിച്ചു പോരുന്ന ഒരു പാര്‍‌ട്ടിയുടെ ഭാഗത്ത് നിന്നും മനുഷ്യത്യ രഹിതമായ ഇത്തരം നടപടികള്‍ ദൗര്‍‌ഭാഗ്യകരമാണ്‌.ദോഹയിലെ കള്‍‌ച്ചറല്‍ ഫോറം ആസ്ഥാനത്ത് സം‌ഘടിപ്പിച്ച സം‌ഗമത്തില്‍ ശക്തമായ പ്രതിഷേധം  അടിവരയിട്ട്‌ കൊണ്ടാണ്‌ അധ്യക്ഷന്‍ പ്രഭാഷണത്തിന്‌ വിരാമമിട്ടത്.

ഭൂമി പിടിച്ചെടുക്കല്‍ സം‌ബന്ധമായ വിഷയങ്ങളുടെ നിയമപരമായ ഇടപെടലുകളുടെ സാധുതയും സാധ്യതയും ശ്രീ അബ്‌ദുല്‍ ഖാദര്‍ സി.എ സവിസ്‌തരം വിശദീകരിച്ചു.

പ്രസ്‌തുത വിഷയത്തിലെ അസ്വാഭാവികതയും അന്യായവും അധാര്‍‌മ്മികതയും ഇരകളുടെ അവകാശവും അക്കമിട്ട്‌ നിരത്തിക്കൊണ്ട്‌ ബഹു: കേരള മുഖ്യ മന്ത്രി ശ്രീ പിണറായി വിജയന്‌ സമര്‍‌പ്പിക്കുന്ന തുറന്ന കത്ത് ഉമര്‍ കളത്തിങ്ങല്‍ സദസ്സില്‍ വായിച്ചു. 

ഇത്തരം പൊതു ജന നന്മയുള്ള വിഷയങ്ങളില്‍ പൊതു സമൂഹത്തിന്റെ പിന്തുണയും പ്രോത്സാഹനവും നേടിയെടുക്കാനുള്ള അനുവദിക്കപ്പെട്ട സകലവിധ സം‌വിധാനങ്ങളും പരമാവധി ഉപയോഗപ്പെടുത്തേണ്ടതിന്റെ ആവശ്യകതയും ഇരകളുടെ സം‌ഗമത്തില്‍ പങ്കുവെയ്‌ക്കപ്പെട്ടു. 

ദൗത്യ വിര്‍‌വഹണത്തിന്റെ തുടര്‍ നടപടികള്‍‌ക്കും നൈരന്തര്യത്തിനും വേണ്ടി ഉമര്‍ കളത്തിങ്ങലിന്റെ നേതൃത്വത്തില്‍ പത്തം‌ഗ പ്രത്യേക സമിതിയെ തെരഞ്ഞെടുത്തു.മുഹമ്മദ് റാഫി,ജാഫർ ആലത്തയിൽ,മൻസൂർ കിഴുപ്പിള്ളിക്കര തുടങ്ങിയവർ സംസാരിച്ചു.ജില്ലാ ജനറൽ സെക്രട്ടറി മർസൂഖ് തൊയക്കാവ് സ്വാഗതം ആശംസിച്ചു. സുബൈർ സി.പി നന്ദി പ്രകാശിപ്പിച്ചു.     
                               

Saturday, August 11, 2018

ദുരിതാശ്വാസം സഹകരിക്കുക

ദോഹ:കാലവർഷക്കെടുതികളെ തുടർന്ന് കേരളത്തിലെ വ്യത്യസ്ത പ്രദേശങ്ങളിൽ ദുരിതമനുഭവിക്കുന്ന കുടും‌ബങ്ങള്‍‌ക്ക്‌ ആശ്വാസമായി വെല്‍‌ഫയര്‍ പാർട്ടി പ്രവർത്തകർ സജീവമായി രം‌ഗത്തുണ്ട്‌. താൽക്കാലിക ക്യാമ്പുകൾ സംഘടിപ്പിച്ചും, ഭക്ഷണം, കുടിവെള്ളം, വസ്ത്രം, ശയ്യോ പകരണങ്ങൾ എന്നിവ നൽകിയും റിലീഫ് പ്രവർത്തനം പുരോഗമിക്കുന്നുണ്ട്.ഈ പ്രവർത്തനങ്ങൾക്ക് സാമ്പത്തിക പരിമിതി പ്രതിസന്ധി സൃഷ്ടിക്കുന്നുണ്ട്. വെള്ളം ഇറങ്ങിക്കഴിഞ്ഞാലും ധാരാളം സേവന പ്രവർത്തനങ്ങൾ സംഘടിപ്പിക്കേണ്ടി വരും.

ഈ പ്രത്യേക സാഹചര്യത്തിൽ ദുരിതമനുഭവിക്കുന്നവര്‍‌ക്ക്‌ കൈത്താങ്ങാകാൻ കൾച്ചറൽ ഫോറവും തീരുമാനിച്ചിരിക്കുന്നു.സി.എഫ്‌ പ്രസിഡന്റ്‌ താജ്‌ ആലുവ പറഞ്ഞു.ആഗസ്റ്റ് 11, 12 (ശനി, ഞായർ) ദിവസങ്ങൾ വെള്ളപ്പൊക്ക ദുരിതാശ്വാസ ദിനമായി ആചരിക്കാൻ പ്രസിഡന്റ്‌ ആഹ്വാനം ചെയ്‌തു.ജില്ലയിലെ യുദ്ധസമാന സന്നദ്ധ സംരം‌ഭങ്ങളില്‍ സജീവരായി മുന്നിട്ടിറങ്ങാന്‍ സി.എഫ്‌.തൃശൂര്‍ ജില്ലാ പ്രസിഡന്റ്‌ ഷംസീര്‍ പ്രവര്‍ത്തകരോട്‌ അഭ്യര്‍ഥിച്ചു.

Monday, August 6, 2018

മുഹ്‌സിന അജ്‌മലിന്‌ സ്വീകരണം

ദോഹ: വെൽഫെയർ പാർട്ടിയുടെ വിദ്യാർത്ഥി വിഭാഗമായ ഫ്രറ്റേണിറ്റി മൂവമെന്റ് തൃശൂർ ജില്ലാ പ്രസിഡന്റ് മുഹ്‌സിന അജ്‌മലിന്‌, കൾച്ചറൽ ഫോറം ഖത്തർ തൃശൂർ ജില്ലാ കമ്മിറ്റി സ്വീകരണം നൽകി.ക്ഷേമ രാഷ്ട്ര നിർമിതിയുടെ പോരാട്ട വീഥിയിൽ ജ്വലിക്കുന്ന നക്ഷത്രങ്ങളാണ് ഫ്രറ്റേണിറ്റി മൂവ്മെന്റ് എന്നും ഈ ആദരവ് സംഘടനക്കുള്ള  പ്രവാസ ലോകത്തിന്റെ അംഗീകാരം ആണെന്നും ചടങ്ങിൽ സംസാരിച്ച കള്‍‌ച്ചറല്‍ ഫോറം ജില്ലാ പ്രസിഡന്റ് ഷംസീർ ഹസൻ പറഞ്ഞു. 

ക്യാമ്പസ്സുകളിലെ നവ ജനാധിപത്യ മുന്നേറ്റങ്ങൾ നേരിടുന്ന പ്രതിസന്ധികളും പ്രബുദ്ധരായ വിദ്യാർത്ഥികളിൽ ഉയർത്തുന്ന പ്രതീക്ഷകളും മുഹ്സിന പങ്കു വെച്ചു. കേവല പ്രഘോഷണങ്ങളല്ല ആത്മാര്‍‌ഥമായ പ്രവര്‍‌ത്തനങ്ങള്‍ കൊണ്ടുള്ള അടയാളപ്പെടുത്തുലകളാണ്‌ ഫ്രട്ടേണിറ്റിയെ ഇതര വിദ്യാര്‍‌ഥി പ്രസ്ഥാനങ്ങളില്‍ നിന്നും വ്യതിരിക്തമാക്കുന്നതെന്നും വിദ്യാര്‍‌ഥി നേതൃത്വം വ്യക്തമാക്കി.ദുശ്ശക്തികളുടെ പ്രകോപനങ്ങളും പ്രചണ്ഢ വാദങ്ങളും കൊണ്ട്‌ പ്രാകൃതമായി നേരിടുമ്പോഴും സമ ചിത്തതയോടെ കര്‍‌മ്മം കൊണ്ട്‌ പ്രതികരിക്കുന്ന ഈ നവ ജാത പ്രസ്ഥാനം കാലഘട്ടത്തിന്റെ തേട്ടമാണെന്നും അവര്‍ കൂട്ടിച്ചേര്‍ത്തു.

സം‌സ്‌ഥാന ജില്ലാ നേതാക്കള്‍ സന്നിഹിതരായിരുന്നു.കള്‍‌ച്ചറല്‍ ഫോറം തൃശൂര്‍ ജില്ല ജനറൽ സെക്രട്ടറി മർസൂക്ക്‌ തൊയക്കാവ്‌ നന്ദി രേഖപ്പെടുത്തി.

Sunday, July 29, 2018

കേരളം കീഴടങ്ങരുത്

ദോഹ:ചരിത്രത്തില്‍ കുപ്രസിദ്ധരായ എകാധിപത്യ സ്വജനപക്ഷപാത ഫാഷിസ്റ്റ് രാഷ്‌ട്ര തലവന്മാരുടെ പുതിയ  പതിപ്പുകളുടെ ആശീര്‍വാദത്തില്‍ ചരിത്രത്തില്‍ തുല്യതയില്ലാത്ത അക്രമോത്സുകരായ സ്വയം സേവകരുടെ സ്വര്‍‌ഗരാജ്യമായി ഭാരതം മാറിക്കഴിഞ്ഞിരിക്കുന്നു.

ഹിറ്റ്‌ലര്‍-മുസോളനി പ്രേത ബാധയേറ്റ ഭരണ സം‌വിധാനം എല്ലാ അര്‍ഥത്തിലും രാജ്യത്തിനും സമാധാന പ്രിയരായ ബഹു ഭൂരിപക്ഷം ജനതയ്‌ക്കും ഭീഷണിയായി തീര്‍‌ന്നിരിക്കുന്നു.ഗുജറാത്ത് കലാപം മുതല്‍ തെക്ക്‌ കേരളത്തിലെ സാമ്പ്രദായിക സാഹോദര്യത്തെ തച്ചു തല്ലി കെടുത്തുന്നതു വരെയുള്ള ഓരോന്നും പരിശോധിച്ചാല്‍ സാക്ഷാല്‍ ഗീബല്‍‌സിയന്‍ രസതന്ത്രം പ്രയോഗിക്കപ്പെട്ടതായി മനസ്സിലാക്കാം.വിദ്വേഷ പ്രചരണവും വിവാദ പ്രസ്‌താവനകളും വീര്‍‌വാണങ്ങളും കൊണ്ട്‌ ശബ്‌ദമലിനീകരണം സൃഷ്‌ടിച്ചും,സമൂഹത്തില്‍ ഊഹാപോഹങ്ങള്‍ പ്രചരിപ്പിച്ചും,ഉള്ളതും ഇല്ലാത്തതും ഒക്കെ ഊതിയൂതി വീര്‍‌പ്പിച്ചും അരക്ഷിതാവസ്ഥ സൃഷ്‌ടിച്ചു കൊണ്ടേയിരിക്കുന്നു.

ഒരു വേള ഔദ്യോഗിക സം‌വിധാനത്തെയടക്കം ഇത്തരം നീചവും നികൃഷ്‌ടവുമായ പ്രവര്‍‌ത്തനങ്ങള്‍‌ക്ക്‌ ദുരുപയോഗപ്പെടുത്തുകയും ചെയ്യുന്നു.ഏറ്റവും ഒടുവില്‍ ആള്‍‌കൂട്ട കൊലപാതകങ്ങളുടെ ചോരകൊണ്ട്‌ ഇന്ത്യന്‍ ഗ്രാമ ഗ്രാമാന്തരീക്ഷങ്ങള്‍ വിറങ്ങലിച്ചു കൊണ്ടിരിക്കുകയാണ്‌.

കുല്‍ബര്‍ഗിയെയും പന്‍സാരയെയും ധബോല്‍ക്കറെയും ഫാഷിസ്റ്റ്‌ ഭീകരര്‍ നിര്‍ഭയം വധിച്ചപ്പോളും, ഗോ മാംസം കഴിച്ചു എന്നാരോപിച്ച് ഒരു ഇന്ത്യന്‍ വായുസേനോദ്യോഗസ്ഥന്റെ പിതാവിനെ സംഘപരിവാരാംഗങ്ങള്‍ അടിച്ചു കൊന്നപ്പോഴും വിശേഷിച്ചൊന്നും സം‌ഭവിച്ച ഭാവം പോലും ഇല്ല.ഇത്തരം അസഹിഷ്‌ണുതയുടെ ജ്വരം കേരളത്തിലേയ്‌ക്കും പടരുന്നതിന്റെ പുതിയ ഉദാഹരണമായിരിക്കണം മീശ എന്ന കൃതിയും അതിന്റെ കര്‍‌ത്താവായ എസ്‌ ഹരീഷ്‌ നേരിട്ട്‌ കൊണ്ടിരിക്കുന്ന വെല്ലുവിളികളും.

ഈ അക്രമോത്സുകതയുടെ തുരുത്തില്‍ നിന്ന്‌ കേവലം വേവലാധിപ്പെടുന്നതിനു പകരം രാഷ്‌ട്രീയമായ പ്രതിരോധങ്ങളും പ്രതിവിധിയും കണ്ടെത്തണം.ഫാഷിസത്തിന്റെ ആള്‍‌കൂട്ട മനശ്ശാസ്‌ത്രം കേരളം കീഴടങ്ങരുത് എന്ന തലക്കെട്ടില്‍ കള്‍‌ച്ചറല്‍ ഫോറം ഒരുക്കിയ പ്രതിരോധ സദസ്സ്‌ അഭിപ്രായപ്പെട്ടു.

ജനങ്ങളില്‍ ഭീതി ജനിപ്പിച്ച് തങ്ങളുടെ തേര്‍‌വാഴ്‌ചയും തേരോട്ടവും നടത്തി ആത്മഹര്‍‌ഷം കൊള്ളുന്ന ഒരു തലമുറയെപ്പോലും ജനിപ്പിച്ചെടുത്ത ഈ വര്‍ഗ്ഗീയ ഫാഷിസം ഇന്ത്യ നേരിടുന്ന ഏറ്റവും വലിയ ശാപമായി മാറിയിരിക്കുന്നു.വളരെ ആസൂത്രിതമായി വളര്‍‌ത്തിയെടുത്ത ഈ ഫാഷിസ ക്രിമനിലസത്തെ ബുദ്ധിപൂര്‍‌വ്വം നേരിടുന്നതില്‍ ഇന്ത്യന്‍ രാഷ്‌ട്രീയ പ്രസ്ഥാനങ്ങള്‍ ദയനീയമായി പരാജയപ്പെടുകയാണ്‌.ഏറെ നിഗൂഢമായ പദ്ധതികള്‍ ആസൂത്രിതമായി ഘട്ടം ഘട്ടമായി വളര്‍‌ത്തിയെടുത്ത് ഇന്ത്യന്‍ ജനാധിപത്യ സംവിധാനത്തിന്റെ അരമനയിലും അധികാരത്തിന്റെ ഈറ്റില്ലത്തും എത്തിച്ചു എന്ന്‌ മാത്രമല്ല അതിനെ ക്രിയാത്മകമായി പരിപാലിക്കുന്നതിലും ഈ ദുശ്ശക്തികള്‍ വിജയിച്ചിരിക്കുന്നു.

ദര്‍‌ശനങ്ങളും ധര്‍‌മ്മങ്ങളും പ്രസാരണ പ്രസന്ന ഭാവത്തില്‍ നിന്നും പ്രകടനഭാവത്തിലേയ്‌ക്ക്‌ ഭീതിതമായി വളരുന്നതിലും വളര്‍‌ത്തുന്നതിലും ഫാഷിസം വഹിച്ച പങ്ക്‌ ഭായനകമാണ്‌.പ്രതിരോധങ്ങള്‍ ശക്തിപ്പെടുമ്പോള്‍ പ്രതിരോധ നിരയെ ദുര്‍‌ബലപ്പെടുത്താനും പരസ്‌പരം ഭിഹ്നിപ്പിക്കാനുമുള്ള തന്ത്രപൂര്‍‌വ്വമായ ശ്രമങ്ങള്‍ തിരിച്ചറിയപ്പെടാതെ പോകരുത്.

ഓരോ ദര്‍‌ശനത്തേയും ഒറ്റപ്പെടുത്തി വളഞ്ഞിട്ട്‌ ആക്രമിക്കുമ്പോള്‍ അക്രമിക്കപ്പെടുന്ന ധാരകളിലെ വീക്ഷണ വൈവിധ്യങ്ങള്‍ ചര്‍‌ച്ച ചെയ്യപ്പെടുന്ന അവസ്ഥ ഫാഷിസത്തിന്നെതിരെയുള്ള പ്രതിരോധ നിരയെ ദുര്‍ബലപ്പെടുത്തുന്ന പ്രധാന കാരണങ്ങളിലിലൊന്നാണ്‌.

അതി ക്രൂരവും മനുഷ്യത്വ രഹിതവുമായ കൃത്യങ്ങള്‍ പോലും സോഷ്യല്‍ മീഡിയ വഴി പ്രചരിപ്പിക്കുന്നതില്‍ ഒരു തരത്തിലുമുള്ള ഭയവുമില്ലാത്ത വിധം ഫാഷിസ ക്രിമനിലിസം സുരക്ഷിതരാണ്‌.ഇത്തരം ഭീതിതമായ ചിത്രങ്ങളും ചിത്രീകരണങ്ങളും ലോകം കാണട്ടെ എന്നുദ്ദേശിച്ച് ഇരകള്‍പൊലും ഇതിന്റെ പ്രചരണത്തില്‍ പങ്കാളികളാകുന്ന അവസ്ഥ പരിതാപകരമാണ്‌.ഭീതി ജനിപ്പിക്കുക എന്ന ഫാഷിസമാണ്‌ ഇവിടേയും അതി ഗം‌ഭീരമായി വിജയിക്കുന്നത് എന്ന്‌ മറന്നു പോകരുത്‌.ചങ്ങലക്ക്‌ ഭാന്ത് പിടിച്ച അവസ്ഥയിലാണ്‌ രാജ്യം അകപ്പെട്ടിരിക്കുന്നത്.

ജാഗ്രതയോടെയും ബുദ്ധിപൂര്‍‌വ്വവും ജനാധിപത്യ സംവിധാനത്തെ അരക്കിട്ടുറപ്പിക്കുന്ന ജനപക്ഷ രാഷ്‌ട്രിയ മുന്നേറ്റങ്ങള്‍ക്ക്‌ ശക്തി പകരുക.സദസ്സ്‌ അടിവരയിട്ടു പ്രഖ്യാപിച്ചു.

കള്‍‌ച്ചറല്‍ ഫോറം സം‌സ്ഥാന വൈസ്‌ പ്രസിഡന്റ്‌ സുഹൈല്‍ ശാന്തപുരം അധ്യക്ഷത വഹിച്ച പ്രതിരോധ സദസ്സില്‍ കള്‍‌ച്ചറല്‍ ഫോറം സം‌സ്ഥാന ജനറല്‍ കൗണ്‍‌സില്‍ അംഗം അഫ്‌സല്‍ എടവനക്കാട്‌ വിഷയാവതരണം നടത്തി.മാധ്യമ പ്രവര്‍ത്തകന്‍ ടി.കെ.എം ഇഖ്‌ബാല്‍,സാഹിത്യകാരന്‍ എം.ടി നിലമ്പൂര്‍, സം‌സ്ഥാന ജനറല്‍ സെക്രട്ടറി സി.സാദിഖലി,സാം‌സ്‌കാരിക പ്രവര്‍‌ത്തകന്‍ അസീസ്‌ മഞ്ഞിയില്‍,ഇഖ്‌ബാല്‍ വടകര,ഫസലു റഹ്‌മാന്‍ കളമശ്ശേരി തുടങ്ങിയവര്‍ സം‌സാരിച്ചു.കള്‍‌ച്ചറല്‍ ഫോറം സം‌സ്ഥാന സെക്രട്ടറി കെ.ടി മുബാറക് സ്വാഗതമാശം‌സിച്ചു.സം‌സ്ഥാന ജനറല്‍ സെക്രട്ടറി മുഹമ്മദ്‌ റാഫി സമാപന പ്രഭാഷണം നടത്തി.

Friday, June 22, 2018

പി.സി വിട പറഞ്ഞു

മണ്ണാർക്കാട്​:ജമാഅത്തെ ഇസ്​ലാമി നേതാവും വെൽഫയർ പാർട്ടി അഖിലേന്ത്യ ജന.സെക്രട്ടറിയുമായ പി.സി.ഹംസ (62) നിര്യാതനായി. എസ്‌.ഐ.ഒ അഖിലേന്ത്യ പ്രസിഡൻറ്​, ജമാഅത്തെ ഇസ്​ലാമി സംസ്​ഥാന സെക്രട്ടറി, മണ്ണാർക്കാട് ഇർഷാദ് സ്കൂൾ ചെയർമാൻ, മീൻ ടൈം ഇംഗ്ലീഷ്​ മാഗസിൻ പത്രാധിപർ എന്നീ നിലകളിൽ പ്രവർത്തിച്ചു. ഇക്കണോമിക് ആൻഡ് സ്റ്റാറ്റിറ്റിക്‌സ് വകുപ്പിൽ ഓഫീസർ ആയിരുന്നു. പത്തിരിപ്പാല മൗണ്ട്​ സീന ഗ്രൂപ്പ്​ സി.ഇ.ഒയും ഇർഷാദ്​ സ്​കൂൾ ഗ്രൂപ്പ്​ ചെയർമാനുമാണ്.

ഖബറടക്കം ജൂണ്‍ 21 വൈകുന്നേരം 5 ന് അരിയൂർ വലിയ പള്ളി ഖബർ സ്ഥാനിൽ നടക്കും.


Sunday, May 13, 2018

അവിസ്‌മരണീയം ഈ കലാസായാഹ്നം

ദോഹ:കൾച്ചറൽ ഫോറം ഗുരുവായൂർ മണ്ഡലം സർഗ്ഗ 2018 സി.ഐ.സി ഹാൾ മൻസൂറയിൽ വിവിധ കലാപരിപാടികളോടെ വർണ്ണാഭമായ വിരുന്നായിരുന്നു ദോഹയിലെ കലാ ആസ്വാദകർക്ക് സമ്മാനിച്ചത്.തിരുവാതിര, മാർഗംകളി, ഭരതനാട്യം ചവിട്ടുനാടകം, കുറുവർഷികളി, ഒപ്പന, സംഗീത ശിൽപ്പം, രംഗാവിഷ്കാരം, കുട്ടികളുടെ ഡാൻസ്,ഫാഷൻ ഷോ ഇവയെല്ലാം കോർത്തിണക്കിക്കൊണ്ടായിരുന്നു സർഗ്ഗ 2018 ഒരുക്കിയത്.
  
സർഗ്ഗ 2018 ന്റെ ഭാഗമായി അവതരിപ്പിച്ച പർപ്പിൾ എന്ന രംഗാവിഷ്കാരം വേദിയും കടന്ന് ആസ്വാദക മനസ്സുകളിൽ കനലായി, പിന്നെ ആളിപ്പടരുന്ന ആധിയായി, കണ്ണീർ മഴയായ് പെയ്തിറങ്ങി.

ആദിമധ്യാന്തം പിരിമുറുക്കത്തോടെ എഴുതപ്പെട്ട രചന തന്നെയാണ് ഈ മികച്ച രംഗാവിഷ്ക്കാരത്തിന്റെ ആധാരശില. വർത്തമാനകാല സംഘർഷങ്ങൾ അരങ്ങിലെത്തിക്കാൻ കഴിവുള്ള സംവിധായകൻ, നടീനടൻമാരും കാഴ്ചക്കാരും തമ്മിൽ നേരിട്ട് സംവദിക്കുമ്പോഴുണ്ടാകുന്ന ജൈവീകത സാധ്യമാക്കി. ഖത്തറിലെ അറിയപ്പെടുന്ന അഭിനേതാവായ ഫൈസൽ അരീക്കാട്ടയിൽ രചനയും സംവിധാനവും തന്റെ കൈകളിൽ ഭദ്രമാണെന്ന് തെളിയിക്കുക കൂടിയാണ് ഈ രംഗാവിഷ്ക്കാരത്തിലൂടെ.വാക്കുകളുടെ ധ്വനിയും, വാക്കുകൾക്കിടയിലെ നിശബ്ദതയും സന്ദർഭത്തിനിണങ്ങുന്ന ചില വരികളുമെല്ലാം ഇണക്കിച്ചേർത്ത് ഫൈസൽ പർപ്പിളിന് തനതായ ഒരു ശില്‍‌പ ഭംഗി നല്കിയിരിക്കുന്നു. നമ്മുടെ സംസ്ക്കാരത്തെ നമ്മൾ തിരിച്ചറിയാതെ പോകുമ്പോഴുണ്ടാകുന്ന മൂല്യച്യുതിയെക്കുറിച്ചുള്ള ഒരു വിലാപമാണ് പർപ്പിൾ. രചന, രംഗ ഭാഷ്യം, സംവേദനക്ഷമത എന്നിവ ചേർന്നുണ്ടായ ദൃശ്യാവിഷ്ക്കാരത്തിന്റെ സമഗ്ര ബിംബമായിരുന്നു പർപ്പിൾ.

മകളെ കാത്തിരിക്കുന്ന ബാപ്പ അവളെക്കുറിച്ചുള്ള ഓർമ്മകൾ പറഞ്ഞു തുടങ്ങുന്നതിലൂടെയാണ് ദൃശ്യാവിഷ്ക്കാര സഞ്ചാരം ആരംഭിക്കുന്നത്. ശിരസ്സിൽ മേഘവും നെറ്റിയിൽ മാലാഖമാരുടെ ചുംബനവുമായി നീ വരുന്നത് ഞാൻ സ്വപ്നം കണ്ടിരുന്നു. നിന്നെ അണിയിക്കാൻ തുന്നിയ ഉടുപ്പും വാടാത്ത പൂക്കളും കരുതി വച്ചിരുന്നു.പക്ഷെ നിന്റെ വരവ് ഇങ്ങനെയായിരിക്കുമെന്ന് ഞാൻ കരുതിയില്ല മോളേ. ഹൃദയം തകർന്നു കരയുന്ന ബാപ്പയ്ക്കരുകിലേയ്ക്ക് അവരെത്തി. ചില താക്കീതുകളുമായ്, " അവരിത് ചെയ്തു കൊണ്ടേ യിരിക്കും " എന്ന ഓർമ്മപ്പെടുത്തലുമായ്.സ്വതന്ത്രയായ് പിറന്ന അവളുടേതു കൂടിയാണ് ഈ രാജ്യവും ലോകവും എന്ന് വിളിച്ചു പറഞ്ഞ് അവർ മറഞ്ഞു.

വെള്ളാരം കണ്ണുള്ള അവൾ ,പറവകളെപ്പോലെ പാറി നടക്കുമായിരുന്ന അവൾ ഇനിമുറിവേൽക്കാൻ ശരീരത്തിലൊരിടം പോലും ബാക്കിയില്ലാതെ, താനനുഭവിച്ച വേദനകൾ കരളലിയിപ്പിക്കുമാറ് വിളിച്ചു പറഞ്ഞ്, എന്നോടെന്തിനീ ക്രൂരതയെന്ന് തേങ്ങി, ഇരുട്ടിന്റെ മറ നീക്കി പ്രത്യക്ഷപ്പെട്ടു.ബാപ്പാ  എന്തിനാ ഞാനീ ഭൂമിയിൽ പിറന്നത് എന്ന് ചോദിച്ചു കൊണ്ട് വരണ്ട തൊണ്ടയിൽ ഒരിറ്റു ദാഹജലത്തിനായ് കേണുകൊണ്ട് പിടഞ്ഞു വീണു.ചേതനയറ്റ ആ പൂമേനി കൈകളിൽ കോരിയെടുത്ത ബാപ്പയ്ക്കൊപ്പം, കാണികൾ വിതുമ്പലടക്കി. നിസ്സഹായനായ ആ പിതാവ് അവൾക്ക് അന്ത്യ ചുംബനം നല്‍‌കി, വെള്ളവിരിയിൽ പുതപ്പിച്ച് അതിനരുകിൽ തളർന്നുവീഴുന്നതോടെ 'പർപ്പിളിന് ' തിരശ്ശീല വീഴുന്നു.

വേദിയുടെ പരിമിതികളെ അനന്ത സാധ്യതകളാക്കി മാറ്റിയ ബാപ്പയും പോലീസുകാരനും, രാഷ്ട്രീയക്കാരനും പകരം വയ്ക്കാനാവാത്ത അഭിനയത്തികവ്  കാഴ്ചവച്ചു. കുറഞ്ഞ സമയത്തിനുള്ളിൽ അണിയിച്ചൊരുക്കിയതെങ്കിലും പരിപൂർണത ലക്ഷ്യം വെച്ച് നാടക പ്രവർത്തകർ നടത്തിയ കഠിനാധ്വാനം കരഘോഷത്തോടെ കാണികൾ സ്വീകരിക്കുകയായിരുന്നു.ബാപ്പയായി അസാമാന്യ അഭിനയമികവിലൂടെ ലത്തീഫ് വടക്കെക്കാട് പ്രേക്ഷകർക്കുള്ളിൽ നൊമ്പരമുണർത്തിയപ്പോൾ ആസിയയായി ജാൻവി റനീഷ് കണ്ണീരായ് പെയ്തിറങ്ങുകയായിരുന്നു. പർപ്പിളിൽ തന്റെ അഭിനയ രംഗത്തെ ഹരിശ്രീ കുറിക്കുകയായിരുന്നു ഈ കൊച്ചു മിടുക്കി. പോലീസ് ഓഫീസറായി അരങ്ങിലെത്തിയ ശംസുദ്ധീൻ, രാഷ്ട്രീയക്കാരനായെത്തിയ നിഷാദ് ഗുരുവായൂർ എന്നിവർ തങ്ങളുടെ കഥാപാത്രങ്ങളോട് നൂറു ശതമാനം നീതി പുലർത്തി.

ഈ കലാവിരുന്നിനെ ഹൃദയാവര്‍‌ജ്ജകമാക്കുന്നതില്‍ അരങ്ങിലും അണിയറയിലും പ്രവര്‍‌ത്തിച്ചവരുടെ സേവനം പ്രശം‌സാര്‍ഹം.ദീപ നിയന്ത്രണം നിർവ്വഹിച്ച പ്രകാശ്, സംഗീത നിയന്ത്രണം നിർവ്വഹിച്ച താലിബ് ഇക്ബാൽ, സാങ്കേതിക സഹായിയായി സഹകരിച്ച ഫർഹസ് മുഹമ്മദ്, ചമയം രഞ്ജിത്ത് ഗോപാൽ , ശബ്ദലേഖനം - ശബ്ദമിശ്രണം എന്നിവ നിർവ്വഹിച്ച പ്രജിത്ത് രാമകൃഷ്ണൻ അറോറ സ്റ്റുഡിയോ എന്നിവര്‍ പർപ്പിൾ എന്ന രംഗാവിഷ്കാരത്തെ പ്രേക്ഷക ഹൃദയത്തില്‍ പതിപ്പിക്കുന്നതില്‍ വഹിച്ച പങ്ക്‌ അഭിമാനാര്‍‌ഹം.

റിപ്പോര്‍‌ട്ട്‌ :-
ദര്‍‌ശന രാജേഷ്.

Saturday, May 12, 2018

നോര്‍‌ക്ക വിശദീകരണ പരിപാടി

ദോഹ:സമൂഹത്തില്‍ വിശിഷ്യാ താഴെക്കിടയിലുള്ള സാധാരണക്കാരില്‍ സാധാരണക്കാരുടെ നൊമ്പരങ്ങളില്‍ തൂവല്‍ സ്‌പര്‍‌ശമാകുക എന്ന പ്രതിജ്ഞാ ബദ്ധതയാണ്‌ കള്‍ച്ചറല്‍ ഫോറത്തിന്റെ മുഖമുദ്ര.ശ്രീ ഷംസീര്‍ പറഞ്ഞു.നോര്‍‌ക്ക പദ്ധതികളും അനുബന്ധ കാര്യങ്ങളും പ്രവാസി സഹോദരങ്ങളില്‍ എത്തിക്കുന്നതിന്റെ ഭാഗമായി കള്‍‌ച്ചറല്‍ ഫോറം ന്യു ഇഡസ്‌ട്രിയല്‍ ഏരിയ സീഷോര്‍ ക്യാമ്പില്‍ വിശദീകരണം നല്‍‌കുകയായിരുന്നു ജില്ലാ പ്രസിഡണ്ട്‌ ഷം‌സീര്‍.കള്‍‌ച്ചറല്‍ ഫോറം എന്തുകൊണ്ട്‌ ഇതര സം‌ഘടനകളില്‍ നിന്നും വേറിട്ടു നില്‍‌ക്കുന്നു എന്ന്‌ സവിസ്‌തരം അദ്ദേഹം വിശദീകരിച്ചു.

നോര്‍‌ക്ക ജില്ലാ ചീഫ്‌ കോഡിനേറ്റര്‍ ശ്രീ അഫ്‌സല്‍ നോര്‍‌ക്കയുടെ വിവിധ പ്രവാസി ക്ഷേമ പദ്ധതികളെ പരിചയപ്പെടുത്തി.കള്‍‌ച്ചറല്‍ ഫോറം സേവന വിഭാഗത്തിന്റെ സേവന സാന്ത്വന പ്രവര്‍‌ത്തനങ്ങളുടെ മാനുഷിക മുഖം ശ്‌ളാഘിക്കപ്പെടുകയും മൂന്ന്‌ സഹോദരങ്ങള്‍ കള്‍‌ച്ചറല്‍ ഫോറം അം‌ഗത്വം സ്വീകരിക്കുകയും ചെയ്‌തതായി ജില്ലാ നേതൃത്വം അറിയിച്ചു.

ഖത്തറിലെ ആദ്യത്തെ നോർക്ക അംഗീകൃത പ്രവാസി സംഘടനയാണ്‌ കള്‍ച്ചറല്‍ ഫോറം.

ജില്ലാ മീഡിയാ വിഭാഗം 

Wednesday, April 25, 2018

ബാഡ്മിന്റണിൽ വീണ്ടും തൃശ്ശൂർ വിജയ ഗാഥ.

ദോഹ: ഏപ്രിൽ 19 മുതൽ 22 വരെ നടന്ന ഡി.എസ്‌.എസ് ബാഡ്മിന്റൺ ഓപ്പൺ ടൂർണമെന്റിലും തൃശൂർ യൂത്ത് ക്ലബ്ബ് താരങ്ങൾക്ക് കിരീടം. തുടർച്ചയായ രണ്ടാമത്തെ ടൂർണമെന്റിലും തൃശ്ശൂർ യൂത്ത് ക്ലബിനെ പ്രതിനിധീകരിച്ച് കളത്തിലിറങ്ങിയ നൗഫലിന്റെയും അജ്മലിന്റെയും കളത്തിലെ വിജയഗാഥ തുടർന്നുകൊണ്ടിരിക്കുന്നു. മത്സരിച്ച രണ്ടിനങ്ങളിലും എതിരാളികളെ നിലം പരിശാക്കിയായിരുന്നു യൂത്ത് ക്ലബ് താരങ്ങളുടെ തേരോട്ടം.

ഖത്തറിലെ ബാഡ്മിന്റൺ ടൂർണമെന്റുകളിൽ സജീവ സാന്നിധ്യമായ തൃശ്ശൂർ യൂത്ത് ക്ലബ് തങ്ങളുടെ സാന്നിധ്യം അരക്കിട്ടുറപ്പിക്കുകയാണ്. പ്രവാസികൾക്കിടയിൽ മികച്ച കളിക്കാരെ കണ്ടെത്തി അവർക്ക് വേണ്ട പ്രോത്സാഹനവും വേദികളുമൊരുക്കി മുന്നോട്ട് പോകുന്നതിൽ തൃശ്ശൂർ യൂത്ത് ക്ലബ് എന്നും മുന്നിട്ട് നിന്നിട്ടുണ്ട്. ഖത്തറിലെ പ്രവാസി കായിക ചരിത്രത്തിൽ തങ്ങളുടെ ഇടം വ്യക്തമായി രേഖപ്പെടുത്തുന്ന വിവിധ പ്രവർത്തനങ്ങളുമായി മുന്നോട്ട് കുതിക്കുന്ന തൃശ്ശൂർ യൂത്ത് ക്ലബിനു പ്രവാസികളുടെ മുഴുവൻ പിന്തുണയുമുണ്ടാകണമെന്ന് മാനേജ്‌മന്റ് അഭ്യർത്ഥിച്ചു.


Monday, April 16, 2018

സർഗ്ഗ 2018 ഒരുങ്ങുന്നു..

ദോഹ: ഗുരുവായൂർ മണ്ഡലം സർഗ്ഗ 2018 എന്ന പേരിൽ ഒരു കലാവിഷ്‌കാരം 2018   ഏപ്രില്‍ 20 ന് (വെള്ളി) വൈകീട്ട്  6 മണിക്ക് സി.ഐ.സി  മന്‍‌സൂറ ഹാളിൽ വെച്ച് അരങ്ങേറുന്നു.

സർഗ്ഗ  2018  തികച്ചും സമകാലിക വിഷയങ്ങളിൽ ഊന്നി നിന്നുള്ള വ്യത്യസ്തമായതും വ്യതിരിക്തമായതും പുതുമയാർന്നതുമായ  കലാവിഷ്കാരമായിരിക്കുമെന്ന്‌ ഗുരുവായൂർ മണ്ഡലം കലാവിഭാഗം പറഞ്ഞു.

എല്ലാ തരത്തിലും തലത്തിലുമുള്ള പ്രേക്ഷകരെയും ആസ്വാദകരെയും ആകർഷിക്കാവുന്ന കലാവിരുന്നായിരിക്കുമെന്നും; കള്‍ച്ചറല്‍ ഫോറത്തെ വളരെ ഹ്രസ്വമായി പരിചയപ്പെടുത്തുന്ന അത്യാകര്‍‌ഷകമായ പരിപാടിയും ഒരുക്കിയിട്ടുണ്ടെന്നും ബന്ധപ്പെട്ടവര്‍ വിശദീകരിച്ചു.

ഗുരുവായൂർ മണ്ഡലമാണ്  പ്രായോജകരെങ്കിലും ഇതിന്റെ ഗുണഫലം കള്‍‌ച്ചറല്‍ ഫോറത്തിന്റെ എല്ലാ മണ്ഡലങ്ങൾക്കും ലഭ്യമാകണമെന്നാണ്‌ അണിയറ പ്രവര്‍‌ത്തകരുടെ അഭിലാഷം.വൈവിധ്യമാര്‍‌ന്ന കലാവിരുന്നിനാല്‍ സമ്പന്നമായ സർഗ്ഗ 2018ല്‍ എല്ലാ സഹൃദയരും കുടുംബസമേതം പങ്കെടുത്ത് ധന്യമാക്കണമെന്നും മണ്ഡലം ഭാരവാഹികള്‍ അഭ്യര്‍‌ഥിച്ചു...

Saturday, April 14, 2018

പെണ്‍ പ്രവാസപ്പെരുമയുടെ പൊലിമ

ദോഹ:  .കൾച്ചറൽ ഫോറം ഖത്തർ വനിതാകൂട്ടായ്മയായ നടുമുറ്റം ഖത്തറിൻറെ രണ്ടാം വാർഷികാഘോഷം  " നടുമുറ്റം ഫിയസ്റ്റ 2018  ഖത്തറിലെ പ്രവാസി മലയാളി വനിതകളുടെ ആവിഷ്കാരനിറവായി . അബൂഹമൂറിലെ അൽ ജസീറ അക്കാദമി ഓഡിറ്റോറിയത്തിൽ നടന്ന പരിപാടിയിലെ  മുഖ്യാതിഥി ഖത്തർ നാഷണല്‍ ബാങ്കിൻറെ ഇൻറർനാഷണൽ കംപ്ലയിൻസ് ആൻഡ് മോണിറ്ററിംഗ് ഹെഡ്  സൽഹ ഹസൻ അൽ ഉബൈദി ഉദ്ഘാടനം ചെയ്തു.കൾച്ചറൽ ഫോറം വൈസ് പ്രസിഡന്‍റ് താഹിറ ബീവി  അധ്യക്ഷത വഹിച്ചു.   വെൽഫെയർ പാർട്ടി കേരള പ്രസിഡന്‍റ് ഹമീദ് വാണിയമ്പലം മുഖ്യപ്രഭാഷണം നിർവ്വഹിച്ചു .കത്‌വയിലെ എട്ടുവയസ്സുകാരിയുടെ കിരാതമായ ബലാല്‍സംഗ കൊലപാതകത്തിനെതിരെയും ഉന്നാവയിൽ ബലാല്‍സംഗത്തിനിരയായ ദലിത് പെൺകുട്ടിക്കുവേണ്ടിയും പ്രതിഷേധം ഉയർന്നു വരേണ്ടതുണ്ടെന്നു അഭിപ്രായപ്പെട്ടു. സ്ത്രീകളാണ് പ്രതിഷേധത്തെ ഏറ്റെടുക്കേണ്ടതെന്നും അദ്ദേഹം കൂട്ടിച്ചേര്‍ത്തു.  മുഖ്യാതിഥികളായ സൽഹ ഹസൻ ഉബൈദി,മുനീറ ഹസൻ ഉബൈദി എന്നിവർക്കുള്ള നടുമുറ്റം സ്നേഹോപഹാരം അധ്യക്ഷ താഹിറ ബീവി കൈമാറി. 

പ്രവാസ ലോകത്ത് മൂന്ന് പതിറ്റാണ്ടോളമായി വീട്ടുവേലക്കാരായി ജോലി ചെയ്യുന്ന കുഞ്ഞാമിന,സൈനബ എന്നിവരെയും ഔദ്യോഗികമായ നഴ്സിംഗ്  ജോലിക്ക് പുറമെ ഹമദിലെ ക്യാൻസർ വാർഡിലെ രോഗികളെ പരിപാലിക്കുന്ന സുമ വിജയകുമാറിനെയും അടുക്കളത്തോട്ടത്തിലൂടെ നൂറുമേനി വിഷാംശമില്ലാത്ത പച്ചക്കറികള്‍ ഉത്പാദിപ്പിക്കുകയും 'മരുഭൂമി ഒരു ഹരിത ഭൂമി 'അവാർഡ് ജേതാവുമായ ജിംഷ കൃഷ്ണ തുടങ്ങിയ മലയാളി വനിതകളെ വെൽഫെയർ പാർട്ടി  പ്രസിഡന്‍റ് ഹമീദ് വാണിയമ്പലം ആദരിച്ചു.

കത്‌‌വയിലെ ആസിഫ,ഉന്നാവയിലെ ദലിത് പെൺകുട്ടി,ഛാർഖഢിലെ അഫ്സാന തുടങ്ങിയ സംഘ്പരിവാർ ക്രൂരതക്കിരയായ പെൺകുട്ടികൾക്കു വേണ്ടി വേദിയിലുള്ളവർ മെഴുകുതിരി പ്രകാശിപ്പിച്ചും സദസ്സിലുള്ളവർ കൈ കോർത്ത് പിടിച്ചും പ്രതിഷേധം പ്രകടിപ്പിച്ചു.   കൾച്ചറൽ ഫോറം സെക്രട്ടറി  സജ്ന സാക്കി പ്രതിഞ്ജ ചൊല്ലിക്കൊടുത്തു.  കൾച്ചറൽ ഫോറം ഖത്തർ പ്രസിഡന്‍റ്  താജ് ആലുവ പരിപാടിക്ക് ആശംസകളർപ്പിച്ചു.

സ്ത്രീകളുടെയും കുട്ടികളുടെയും വർണ്ണ ശബളിമയാർന്ന കലാ  പരിപാടികൾ ഏറെ വ്യത്യസ്തത പുലർത്തി. ഇലൈഹി സബീല, അഫീഫ ഹുസ്ന എന്നിവരുടെ സംഭാഷണാഭിനയത്തോടെ   ആരംഭിച്ച കലാപരിപാടികള്‍ക്ക്  കേരളത്തിന്‍റെ  തലസ്ഥാന നഗരിയായ തിരുവനന്തപുരം മുതല്‍ വടക്കേ അറ്റത്തുള്ള കാസർഗോഡ് വരെയുള്ള ജില്ലകളിലെ സ്ത്രീകളും കുട്ടികളും കലയുടെ ചിലങ്കയണിഞ്ഞപ്പോൾ വേദിയില്‍ നിറഞ്ഞത് മോഹിനിയാട്ടം മുതല്‍ വ്യത്യസ്തത നിറഞ്ഞ കലാരൂപങ്ങള്‍. 

കൊച്ചു കുട്ടികളവതരിപ്പിച്ച സ്വാഗത നൃത്തത്തിൻറെ അകമ്പടിയോടെ  തുടങ്ങിയ കലയുടെ കേളികൊട്ട് കൊച്ചു നർത്തകിമാരുടെ മാർഗം കളി,മയിലാട്ടം എന്നിവയും  തിരുവാതിരക്കളി,വഞ്ചിപ്പാട്ട്, ഒപ്പന,ഹാസ്യത്മകതയിലൂടെ ഒരുക്കിയ കിച്ചൺമ്യൂസിക് എന്നിവയിലൂടെ സദസ്സിനും വേദിക്കും  ആസ്വാദനത്തിൻറെ വർണ്ണം പകർന്നു.  നിശ്ശബ്ദതയിലൂടെ സാമൂഹ്യ വിമർശനവും വലിയ സന്ദേശങ്ങളും ഉയർത്തിപ്പിടിച്ച മൈമും  വികസനങ്ങൾ ജനദ്രോഹപരമാകുന്നതിനെതിരെ ഗെയിലിൻറെയും നാലുവരിപ്പാതയുടെയും ഇരകൾക്കൊപ്പം നിന്ന നാടകവും എൻഡോസൾഫാൻ ഇരകൾക്ക് ഐക്യദാർഢ്യം പ്രകടിപ്പിച്ച് നടത്തിയ കവിതാ പാരായണവും സ്ത്രീകള്‍ നേരിടുന്ന അതിക്രമങ്ങളെ ചൂണ്ടിക്കാണിച്ച സംഗീത ശിൽപവും സദസ്സിനെ കേരളത്തിലെ  സമകാലിക സാമൂഹിക പ്രശ്നങ്ങളിലേക്ക് വഴി നടത്തിച്ചു.

കേരളത്തിലെ  വ്യത്യസ്ത ജില്ലകളുടെ  തനത് രുചിക്കൂട്ടുകളെ സമ്മാനിച്ചുകൊണ്ട് ഫുഡ്സ്റ്റാളുകളും  കരകൌശല വസ്തുക്കളുടെയും ആർട്ട് വർക്കുകളുടെയും സ്റ്റാളുകളും ഫിയസ്റ്റയുടെ ഭാഗമായി ഒരുക്കിയിരുന്നു. സ്റ്റാളുകളുടെ ഉദ്ഘാടനം വെൽഫെയർപാർട്ടി കേരള സംസ്ഥാന പ്രസിഡന്‍റ് ഹമീദ് വാണിയമ്പലവും കൾച്ചറൽ ഫോറം ഖത്തർ പ്രസിഡന്‍റ്  താജ് ആലുവയും ചേർന്ന് നിർവ്വഹിച്ചു.

ഫിയസ്റ്റയുടെ ഭാഗമായി നടത്തിയ രചനാ മത്സരങ്ങളിലെ വിജയികളെ പ്രഖ്യാപിച്ചു. ഇലൊക്യൂഷൻ മത്സരത്തില്‍  സാജിദ സാജിദ് ഒന്നാം സ്ഥാനവും ഇലൈഹി സബീല,സിബി മനോജ് എന്നിവർ രണ്ടാം സ്ഥാനവും നദീറ അഹമ്മദ് മൂന്നാം സ്ഥാനവും മോണോ ഡ്രാമ മത്സരത്തില്‍  ആരതി പ്രജിത്ഒന്നാം സ്ഥാനവും ഇലൈഹി സബീല രണ്ടാം സ്ഥാനവും റസിയ അഷ്റഫ് മൂന്നാം സ്ഥാനവും ഉപന്യാസ രചനയില്‍     സാജിദ സാജിദ് ഒന്നാം സ്ഥാനവും സിബി ജോസഫ് രണ്ടാം സ്ഥാനവും മുബീന ഹസൻ,ഫനാന ആസിഫ് എന്നിവർ മൂന്നാം സ്ഥാനവും കവിത രചനയിൽ ഫഹീമ ഷബീർ ഒന്നാം സ്ഥാനവും ഫനാന രണ്ടാം സ്ഥാനവും സാജിദ സാജിദ് മൂന്നാം സ്ഥാനവും കഥ രചനയില്‍ ഫഹീമ ഷബീർ ഒന്നാം സ്ഥാനവും ഫനാന രണ്ടാം സ്ഥാനവും സിജി മനോജ് മൂന്നാം സ്ഥാനവും നേടി.

വിജയികൾക്കുള്ള സമ്മാനദാനം സൽഹ ഹസൻ അൽ ഉബൈദിയും മുനീറ ഹസൻ അൽ ഉബൈദിയും നിർവ്വഹിച്ചു. വിവിധ ഏരിയകളിലെ നടുമുറ്റം കോഡിനേറ്റർമാരും പ്രോഗ്രാം വകുപ്പ് കൺവീനർമാരും പരിപാടികള്‍ക്ക് നേതൃത്വം നൽകി. പ്രോഗ്രാം കൺവീനർ  നൂർജഹാൻ ഫൈസൽ സ്വാഗതവും കൾച്ചറൽ ഫോറം സെക്രട്ടറി  സജ്ന സാക്കി നന്ദിയും പറഞ്ഞു.

നടുമുറ്റം തകര്‍‌ത്താടിയ നിമിഷങ്ങള്‍

ദോഹ:കൾച്ചറൽ ഫോറം വനിതാ കൂട്ടായ്‌മ നടുമുറ്റം രണ്ടാം വാർഷികാഘോഷം നടുമുറ്റം ഫിയസ്റ്റ 2018 സംഘാടനം കൊണ്ടും വൈവിധ്യം കൊണ്ടും അവതരണം കൊണ്ടും പങ്കാളിത്തം കൊണ്ടും വൻവിജയമാക്കി തീർക്കാൻ വനിതകൾക്ക് സാധിച്ചു. ഖത്തറിലെ മറ്റു വനിതാ കൂട്ടായ്‌മകൾക്ക് അവകാശപ്പെടാനില്ലാത്ത തരത്തിൽ സംഘാടന ശേഷിയിലും വിഭവ സമൃദ്ധിയിലും തങ്ങൾ ബഹുദൂരം മുന്നിലാണെന്ന് അടിവരയിട്ട് തെളിയിക്കാൻ നടുമുറ്റത്തിനായി. എല്ലാ നടുമുറ്റം പ്രവർത്തകരും പ്രത്യേകം അഭിനന്ദമര്‍‌ഹിക്കുന്നു എന്ന്‌ വിവിധ പ്രാദേശിക ജില്ല കള്‍‌ച്ചറല്‍ ഫോറം നേതാക്കള്‍ പ്രതികരിച്ചു.ജില്ലയുടെ വിവിധ ഘടകങ്ങള്‍ പ്രശംസാര്‍‌ഹമായ പ്രയത്നങ്ങളിലായിരുന്നുവെന്ന്‌ ജില്ലാ പ്രസിഡന്റ്‌ ഷം‌സീര്‍ കേച്ചേരി പറഞ്ഞു.അശ്രാന്ത പരിശ്രമമായിരുന്നെന്ന്‌ ജനറല്‍ സെക്രട്ടറി മര്‍‌സൂഖ്‌ തൊയക്കാവും പ്രതികരിച്ചു.

രണ്ടോ മൂന്നോ ദിവസത്തെ മാത്രം റിഹേഴ്‌സല്‍ കൊണ്ടാണ് ഇത്ര ഗംഭീരമായ പ്രകടനം കാഴ്‌ചവെക്കാന്‍ സാധിച്ചത്. ഇത്‌ കോർഡിനേറ്റ് ചെയ്‌ത ആബിദ സുബൈര്‍ , റിഹേഴ്‌സലിന്‌ നേത്രൃത്വം കൊടുത്ത്‌ അരങ്ങിലെത്തിച്ച  മാജിദ ഷാഹിദ്‌, സന ഷറിന്‍ ,നിസി ലത്വീഫ്‌,സന ഷംസീര്‍,സീനത്ത് ഉമര്‍,വഫാ ഉമര്‍,ഹര്‍‌ഷ,ദേവിക കൂടാതെ ഏറെ താല്‍‌പര്യത്തോടെ ഇതോടൊപ്പം പ്രവര്‍‌ത്തിച്ചവര്‍‌ക്കും   അഭിനന്ദനങ്ങൾ അറിയിക്കുന്നതായി ഗുരുവായൂര്‍  മണ്ഡലം ഭാരവാഹികള്‍ പറഞ്ഞു.

ഗുരുവായൂർ മണ്ഡലം ഒരുക്കുന്ന  സർഗ 2018 എന്ന കള്‍ച്ചറല്‍ ഇവന്റ്‌ ഏപ്രിൽ 20 ന്  വൈകീട്ട് 6-30 ന് മൻസൂറയിലെ സി.ഐ.സി ഓഡിറ്റോറിയത്തിൽ അരങ്ങേറുന്ന വിവരവും പങ്കുവെയ്‌ക്കപ്പെട്ടു.പുതുമയും, വ്യത്യസ്തവുമായ ഈ കലാവിരുന്നിലേക്ക് ജില്ലയിലെ എല്ലാ അംഗങ്ങളേയും കുടുംബങ്ങളേയും സ്വാഗതം ചെയ്യുന്നതായും ഗുരുവായൂര്‍ സാരഥികള്‍ പറഞ്ഞു.

നടുമുറ്റം പരിപാടിയുടെ വിജയത്തിനായി കൂടെ നിന്ന്‌ ഇതിനെ നെഞ്ചിലേറ്റി കുടുംബ സമേതം പ്രയത്നിച്ച കുടുംബാംഗങ്ങളെ സ്‌മരിക്കാതിരിക്കാന്‍ കഴിയില്ലെന്ന്‌ ജില്ല വൈസ്‌ പ്രസിഡന്റ്‌ ആബിദ സുബൈര്‍ പ്രതികരിച്ചു.ഉമര്‍ കളത്തിങ്കല്‍,  ലത്തീഫ്, ഷറിന്‍, ഷാഹിദ്..എന്നിവരെ നന്ദിയോടെ സ്‌മരിക്കുന്നതായി  ആബിദ കൂട്ടിച്ചേര്‍‌ത്തു ..

കൾച്ചറൽ ഫോറം മണലൂർ മണ്ഡലം പ്രതിനിധി എന്ന നിലയിൽ മനം നിറഞ്ഞു കൊണ്ടാണ് പരിപാടി അവസാനിച്ചു മടങ്ങിയത്.മണ്ഡലം സാരഥി അനസ്‌ ജമാല്‍ പ്രതികരിച്ചു. പരിപാടിക്കുള്ള സജ്ജീകരണങ്ങൾ ഒരുങ്ങുമ്പോൾ തന്നെ മുൻപന്തിയിൽ മണലൂരിന്റെ പ്രയത്നമുണ്ടായിരുന്നു. വേദിയിൽ ഓടി നടന്നു വിവിധ സജ്ജീകരണങ്ങൾ ഒരുക്കാൻ പ്രതിനിധികളായി എത്തിയവർ കുറഞ്ഞ സമയത്തിനുള്ളിൽ സ്‌തുത്യർഹമായ സേവനമാണ് നിർവഹിച്ചത്.എന്നും അനസ്‌ അഭിപ്രായപ്പെട്ടു.

തൃശ്ശൂർ ജില്ലയുടെ സംഗീത ശിശില്‍‌പം അരങ്ങിൽ തകർത്താടിയപ്പോൾ ജില്ലയിലെ മണ്ഡലങ്ങളുടെ പ്രാതിനിധ്യം പ്രകടമായിരുന്നു. സ്റ്റേജിലും അണിയറയിലും വിയർപ്പൊഴുക്കിയവർക്ക് അഭിമാനിക്കാം,കലാപരിപാടികളിൽ വിഷയം കൊണ്ടും വൈവിധ്യം കൊണ്ടും ഏറ്റവും  മുൻപന്തിയിൽ നിന്നത് തൃശൂര്‍ ജില്ലയുടെ സംഗീത ശിൽപം തന്നെയായിരുന്നു. മർദ്ധിതരോടുള്ള ഐക്യദാർഢ്യം സദസ്സ് ഒന്നടങ്കം എഴുന്നേറ്റു നിന്ന് പ്രഖ്യാപിച്ചപ്പോൾ തൃശ്ശൂർ ജില്ലക്കാരുടെ അഭിമാന നിമിഷങ്ങളായിരുന്നു.

ഇട വേളയില്‍ ഫുഡ്‌കോർട്ട് സന്ദർശിച്ചപ്പോൾ വലിയ തിരക്കു കണ്ട് അത്ഭുതപ്പെട്ടുപോയി. പാലട-പായസം ഗംഭീരമായെന്ന ആരുടെയോ വാക്കുകൾ  ശ്രദ്ദയിൽ പതിഞ്ഞു, സ്റ്റാൾ സന്ദർശിച്ചപ്പോൾ കണ്ടത് മണലൂരിന്റെ തന്നെ രുചിപെരുമയും വിഭവങ്ങളുടെ വൈവിധ്യവുമായിരുന്നു. ചൂടപ്പം പോലെ വിറ്റഴിഞ്ഞ വിഭവങ്ങളുടെയും സ്റ്റാളിന്റെയും ആധിപത്യവും അങ്ങിനെ മണലൂർ തന്നെ കയ്യടക്കി.

നിറഞ്ഞ സദസ്സും സദസ്സിന്റെ പിന്തുണയും പരിപാടിയുടെ മാറ്റ് കൂട്ടുന്നതിൽ വലിയ പങ്കു വഹിക്കുന്നു എന്ന കാര്യത്തിൽ തര്‍ക്കമില്ലെന്ന്‌ നിസ്സംശയം പറയാം. ഈ സദസ്സ് സംഘടിപ്പിക്കാനുള്ള പ്രയത്നം വളരെ വലുതായിരുന്നിരിക്കും.ജില്ലാ പ്രാദേശിക ഘടകങ്ങളുടെ ക്ഷണം സ്വീകരിച്ചെത്തിയ നിരവധി കുടുംബങ്ങളെ സദസ്സില്‍ കാണാൻ സാധിച്ചു.പ്രേക്ഷകർക്ക് അവരുടെ പ്രതീക്ഷയെക്കാളുപരി തികച്ചും സഭ്യമായ വിരുന്നൊരുക്കിയതിലും ജില്ലാ പ്രാദേശിക സാരഥികള്‍‌ക്ക്‌ പെരുത്ത് സന്തോഷം.ജില്ലയിലെ ഇതര മണ്ഡലങ്ങളും തൃശൂര്‍ ജില്ലയും നടുമുറ്റം വാര്‍‌ഷികത്തില്‍ അക്ഷരാര്‍‌ഥത്തില്‍ തിളങ്ങി.

വിഷു ആശംസകള്‍ ..

ആളുന്ന വെയിലിന്റെ അഗ്നിയെ ആത്മാവിലേക്ക്‌ ആവാഹിച്ച്‌ ഊതിക്കാച്ചിയ പൊന്നിന്റെ ശോഭയാല്‍ സര്‍വ്വാഭരണ വിഭൂഷിതയായി ഒരുങ്ങി നില്‍ക്കുന്ന കണിക്കൊന്നകള്‍ മലയാളിയുടെ മനസ്സ്‌ തണുപ്പിക്കും . വഴിയരികിലും പറമ്പിലും പൂത്തുലഞ്ഞ്‌ സ്വര്‍ണ്ണം വാരിവിതറിയതുപോലെ മോഹിപ്പിച്ചുകൊണ്ടു നില്‍ക്കുകയാണ്‌ വിഷുവിന്റെ കൈനീട്ടമായ കണിക്കൊന്നകള്‍ . നമ്മുടെ സംസ്ഥാനത്തിന്റെ ഔദ്യോഗിക പുഷ്‌പമാണ്‌ കണിക്കൊന്ന. തായ്‌ലന്‍ഡിന്റെ ദേശീയ വൃക്ഷവും കണിക്കൊന്ന തന്നെ. 'കാഷ്യഫിസ്റ്റുല' എന്ന ശാസ്‌ത്രീയ നാമമുള്ള കണികൊന്നയ്‌ക്ക്‌ സംസ്‌കൃതത്തില്‍ 'കര്‍ണ്ണികാരം, ആരഗ്വധ, രാജവ്യക്ഷ, ശ്വാമാം, ദീര്‍ഘഫല, ' എന്നും പേരുകളുണ്ട്‌. പേരുകളെ അന്വര്‍ത്ഥമാക്കും വിധം തന്നെയാണ്‌ കണിക്കൊന്ന കാഴ്‌ചയിലും.
വിഷു ആശംസകള്‍ ....

Friday, April 13, 2018

സാമൂഹ്യമാറ്റത്തിന്റെ പെരുമ്പറ

ദോഹ:അഹങ്കാരത്തിന്റെ ആഢ്യത്വത്തിന്റെ വര്‍‌ണ്ണവെറിയുടെ പൊതു ബോധം ആസൂത്രിതമായി സൃഷ്‌ടിച്ചെടുക്കപ്പെട്ട ഭാരതീയ സമൂഹത്തില്‍  സാമൂഹ്യമാറ്റത്തിന്റെ പെരുമ്പറ മുഴക്കുകയാണ്‌ വെല്‍ഫെയര്‍ പാര്‍‌ട്ടി ഓഫ്‌ ഇന്ത്യ.സംസ്ഥാന പാര്‍‌ട്ടി പ്രസിഡന്റ്‌ ഹമീദ്‌ വാണിയമ്പലം പ്രഖ്യാപിച്ചു.അശോക ഹാള്‍ വി.പി.കുഞ്ഞാലി നഗറില്‍ കള്‍‌ച്ചറല്‍ ഫോറം സം‌ഘടിപ്പിച്ച സമ്മേളനത്തില്‍ അണികളെ അഭിസം‌ബോധന ചെയ്യുകയായിരുന്നു ശ്രീ.വാണിയമ്പലം.

ജനാധിപത്യ രാഷ്‌ട്രീയ സംസ്‌കാരത്തിന്റെ പാരമ്പര്യത്തില്‍ നിന്നും സ്വാഛാധിപത്യത്തിലേയ്‌ക്ക്‌ ഇന്ത്യ അധഃപ്പതിക്കുമ്പോള്‍ പരമ്പരാഗത രാഷ്‌ട്രീയ സംവിധാനങ്ങള്‍ പ്രതികരിക്കാന്‍ പോലുമാകാതെ പരിഭ്രമിക്കുക മാത്രമാണ്‌ ചെയ്യുന്നത്.ഫാഷിസത്തിന്റെ ഘട്ടം ഘട്ടമായ അധിനിവേശം വിവരണാതീതമായി പുരോഗമിക്കുമ്പോഴും ക്രിയാത്മകമായി പ്രതിരോധിക്കാനും പ്രവര്‍‌ത്തിക്കാനും ഈ പാരമ്പര്യവാദികള്‍ക്ക്‌ സാധിക്കുന്നില്ല.ഫാഷിസം തന്നെയാണോ അതല്ല അതിന്റെ മറ്റെന്തെങ്കിലും രൂപമാണോ എന്നൊക്കെയുള്ള നിര്‍‌വചനങ്ങളും നിഗമനങ്ങളും ഗവേഷണം ചെയ്‌തു കൊണ്ടിരിക്കുകയാണ്‌ ഇടതു പക്ഷവും അവരുടെ ബുദ്ധി കേന്ദ്രങ്ങളും. 

എതിരഭിപ്രായങ്ങളും പ്രതികരണ ശബ്‌ദങ്ങളും ഉന്മൂലനം ചെയ്യപ്പെടുന്ന അതിക്രൂരമായ നാളുകള്‍‌ക്ക്‌ ഇന്ത്യന്‍ ജനത സാക്ഷിയായി.ന്യൂന പക്ഷ ദളിത് വേട്ടകളും വംശീയ ജാതീയ തേരോട്ടങ്ങളും ചരിത്രത്തില്‍ തുല്യതയില്ലാത്ത വിധം അരങ്ങു തകര്‍‌ത്താടിക്കൊണ്ടേയിരിക്കുന്നു.

സം‌വാദങ്ങളില്‍ നിന്നും അകലം പാലിക്കുകയും ഏക പക്ഷീയമായി സംസാരിക്കുകയുമാണ്‌ ഇന്ത്യന്‍ പ്രധാന മന്ത്രി.അന്താരാഷ്‌ട്ര ബന്ധങ്ങളെപ്പോലും തങ്ങളുടെ കൂട്ടു കച്ചവടക്കാരെ പ്രീണിപ്പിക്കാനും പ്രോത്സാഹിപ്പിക്കാനും ദുരുപയോഗം ചെയ്യുന്ന അത്യന്തം ദുഖകരമായ വാര്‍ത്തകളാണ്‌ കേള്‍ക്കാന്‍ കഴിയുന്നത്.അടിസ്ഥാന വര്‍‌ഗങ്ങളുടെ അടുക്കള പുകയുന്നതിനെക്കാള്‍ ആ വിഭാഗത്തെ തീര്‍‌ത്തും പുകച്ചു ചാടിക്കുന്നതിലാണ്‌ സര്‍‌ക്കാരിന്‌ ഹരം.രാജ്യത്തെ അടിമുടി മാറ്റി പ്രതിഷ്‌ഠിക്കുന്ന അതി ക്രൂര കൃത്യങ്ങളാണ്‌ നടമാടിക്കൊണ്ടിരിക്കുന്നത്.നീതി ന്യായ നിയമ പാലന സംവിധാനം പോലും താറുമാറായിക്കൊണ്ടിരിക്കുന്നു.രാജ്യത്തിന്റെ ഫെഡറല്‍ സംവിധാനം പോലും ദുര്‍‌ബലമാകും വിധമുള്ള നിയമ ഭേദഗതികള്‍ ചുട്ടെടുത്തു കൊണ്ടിരിക്കുകയാണ്‌.

വിരലിലെണ്ണാവുന്നത്ര വമ്പന്‍ സ്രാവുകളുടെ സമ്പല്‍ സമൃദ്ധിയും ക്ഷേമവും ഒരു രാജ്യത്തിന്റെ അടിസ്ഥാന വര്‍‌ഗങ്ങളുടെ കണ്ണിരും ചോരയും ചേര്‍‌ത്ത് പരിപാലിക്കുന്ന തരത്തിലാണ്‌ കാര്യങ്ങള്‍ മുന്നേറുന്നതെന്ന്‌ ഏതു സാധാരണക്കാരനും ബോധ്യമാകും. 

നിരര്‍‌ഥകമായ വാദഗതികളും വാസ്‌തവ വിരുദ്ധമായ പ്രസ്താവനകളും വെറുപ്പിന്റെയും അറപ്പിന്റെയും രാഷ്‌ട്രീയവും കൊണ്ട്‌ രാജ്യത്തിന്റെ സൗഹൃദവും സാഹോദര്യവും തച്ചു തരിപ്പണമാക്കുന്ന കാഴ്‌ചയാണ്‌ കണ്ടുകൊണ്ടിരിക്കുന്നത്.തിന്മയിലും തീവ്രവാദത്തിലും അധിഷ്‌ടിതമായ ഒരു സംഘ്‌ പരിവാര്‍ അജണ്ടയെ സാക്ഷാത്കരിക്കാനുള്ള തീവ്രയജ്ഞത്തില്‍ ഭാരതത്തിന്റെ ആത്മാവ്‌ പിടയുകയാണ്‌.ഭീകരതയും തീവ്രതയും ഉറഞ്ഞാടുമ്പോള്‍ ഒരു ജനാധിപത്യ സം‌വിധാനം അവരോടൊപ്പം ആഘോഷിക്കുന്ന അതിഭയാനക അവസ്ഥയും വ്യവസ്ഥയും രാജ്യത്ത് വന്നു കഴിഞ്ഞു.ഈ അപകടം തിരിച്ചറിയാത്ത സാഹചര്യം ഏറെ ഭയാനകമാണെന്നും വാണിയമ്പലം പറഞ്ഞു.

ഭരണ പക്ഷം അവതരിപ്പിച്ചാല്‍ പ്രതി പക്ഷം എതിര്‍‌ക്കും.എന്ന നടപ്പ്‌ രീതികള്‍‌ക്കപ്പുറമത്രെ പാര്‍‌ട്ടിയുടെ നടപടിക്രമങ്ങള്‍.സം‌വാദങ്ങള്‍ പോലും രാഷ്‌ട്രീയ പ്രേരിതമായ കാലത്ത് ജനപക്ഷത്ത് നിന്ന്‌ കാര്യങ്ങള്‍ വീക്ഷിക്കുകയും ജനോപകാര പ്രദമായത്, അല്ലാത്തത് എന്ന തിരിച്ചറിവില്‍ നിന്നു കൊണ്ട്‌ രാഷ്‌ട്രീയ നീക്കങ്ങളും പ്രവര്‍‌ത്തനങ്ങളും എന്നതാണ്‌ വെല്‍‌ഫെയര്‍ പാര്‍‌ട്ടിയുടെ നയവും നിലപാടും.ശ്രീ.വാണിയമ്പലം വിശദീകരിച്ചു. 

നിറഞ്ഞു കവിഞ്ഞ സദസ്സിനെ സാക്ഷിയാക്കി പാര്‍‌ട്ടി പ്രവര്‍‌ത്തകരുടെ ആവേശകരമായ വരവേല്‍പ്പ്‌ ഏറ്റിവാങ്ങി ഹമീദ്‌ വാണിയമ്പലം സദസ്സിലെത്തി.സം‌സ്ഥാന നേതൃ നിരയിലെ കരുത്തനായ സുഹൈല്‍ ശാന്തപുരത്തിന്റെ സ്വാഗത ഭാഷണത്തോടെയായിരുന്നു സമ്മേളനത്തിനു തുടക്കം കുറിച്ചത്.സംസ്ഥാന പാര്‍ട്ടി അധ്യക്ഷനായി വീണ്ടും തെരഞ്ഞെടുക്കപ്പെട്ട ഹമീദ്‌ വാണിയമ്പലത്തിനുള്ള സ്വീകരണ യോഗത്തില്‍ കള്‍‌ച്ചറല്‍ ഫോറം പ്രസിഡന്റ്‌ ഡോക്‌ടര്‍ താജ്‌ ആലുവ അധ്യക്ഷത വഹിച്ചു.കള്‍‌ച്ചറല്‍ ഫോറം സംസ്ഥാന നേതാക്കള്‍ വേദിയെ ധന്യമാക്കി.

കേര്‍ളത്തിലെ പല പ്രവാസി സം‌ഘങ്ങളും കൂട്ടായ്‌മകളും യുവജന വിഭാഗങ്ങളും തങ്ങളുടെ പിന്തുണയും സഹകരണവും സമ്മേളനത്തില്‍ പ്രഖ്യാപിച്ചു.ശ്രീ.തോമസ്സ്‌ സ്‌റ്റീഫന്റെ  നേതൃത്വത്തില്‍ ഖത്തര്‍ കനായായ കള്‍‌ച്ചറല്‍ അസോസിയേഷനും പിന്തുണയും സഹകരണവും പ്രഖ്യാപിച്ചവരില്‍ ഉള്‍‌പ്പെട്ടിരുന്നു.രാഷ്‌ട്രീയ പാരമ്പര്യമുള്ള ചില വ്യക്തിത്വങ്ങള്‍ പാര്‍‌ട്ടി അധ്യക്ഷനില്‍ നിന്നും നേരിട്ട്‌ അം‌ഗത്വം സ്വീകരിക്കുന്നതിനും വേദി സാക്ഷ്യം വഹിച്ചു.

വിവിധ ജില്ലകളെ പ്രതിനിധീകരിച്ച്‌ ജില്ലാ സാരഥികളും പ്രാദേശിക നേതാക്കളും പ്രസിഡന്റിനെ ഹാരാര്‍‌പ്പണം നടത്തിയും ഷാള്‍ അണിയിച്ചും സ്വീകരിച്ചു.കൂടാതെ വിവിധ ജനക്ഷേമ പ്രവര്‍‌ത്തനങ്ങളും ക്ഷേമ പദ്ധതികളും നിയുക്ത പ്രസിഡന്റിന്റെ സാന്നിധ്യത്തില്‍ പ്രതീകാത്മകമായി അവതരിപ്പിക്കുകയും പ്രഖ്യാപിക്കുകയും ചെയ്‌തു.

തിരുവനന്തപുരം,കൊല്ലം,പത്തനംതിട്ട,ആലപ്പുഴ,കോട്ടയം,എറണാങ്കുളം,
തൃശൂര്‍,പാലക്കാട്‌,മലപ്പുറം,കോഴിക്കോട്‌,വയനാട്‌,കണ്ണൂര്‍,കസര്‍കോഡ്‌ എന്നീ ജില്ലകളുടെ സാരഥികളും പ്രതിനിധികളും യഥാക്രമം തങ്ങളുടെ ദൗത്യം നിര്‍വഹിച്ചു.

സെക്രട്ടറി മുഷ്‌താക് നന്ദി പ്രകാശിപ്പിച്ചു.

തൃശൂര്‍ ജില്ലാ മീഡിയ

Thursday, April 12, 2018

പൊതു സമ്മേളനം ഇന്ന്‌

ദോഹ:വെഫെയര്‍ പാര്‍‌ട്ടി കേരള പ്രസിഡന്റ് പദവിയിലേയ്‌ക്ക്‌ വീണ്ടും തെര്‍ഞ്ഞെടുക്കപ്പെട്ട ഹമീദ്‌ വാണിയമ്പലത്തിനുള്ള സ്വീകരണവും പൊതു സമ്മേളനവും ഇന്ന്‌ നടക്കുമെന്ന്‌ കള്‍‌ച്ചറല്‍ ഫോറം ഭാരവാഹികള്‍ അറിയിച്ചു.

രാത്രി 7.45 ന്‌ വി.കെ കുഞ്ഞാലി നഗറില്‍ (ഐ.സി.സി അശോക ഹാളില്‍)നടക്കുന്ന പരിപാടിയില്‍ അദ്ദേഹം സം‌സാരിക്കും.കള്‍‌ച്ചറല്‍ ഫോറം പ്രസിഡന്റ്‌ താജ്‌ ആലുവ അധ്യക്ഷത വഹിക്കും.ഇന്ന്‌ ഉച്ചയോടെ ദോഹയിലെത്തുന്ന ഹമീദ്‌ വാണിയമ്പലം മൂന്ന്‌ ദിവസങ്ങളിലായി നടക്കുന്ന വിവിധ പരിപാടികളില്‍ സം‌ബന്ധിക്കും.ജില്ല ഭാരവാഹികള്‍,മണ്ഡലം പ്രസിഡന്റ്‌,ജനറല്‍ സെക്രട്ടറിമാര്‍,നടുമുറ്റം കണ്‍‌വീനര്‍മാര്‍ എന്നിവര്‍‌ക്കായി വെള്ളിയാഴ്‌ച രാവിലെ 7.30 മുതല്‍ നടക്കുന്ന പരിശീലന പരിപാടി ലീഡേര്‍‌സ്‌ എന്‍‌ക്ലെവ്, രാത്രി അല്‍‌ജസീറ അക്കാദമിയില്‍ നടക്കുന്ന നടുമുറ്റം ഫിയസ്റ്റ 2018,ശനിയാഴ്‌ച നടക്കുന്ന പ്രത്യേകം ക്ഷണിക്കപ്പെട്ടവരുടെ യോഗം തുടങ്ങിയവയില്‍ അദ്ദേഹം പങ്കെടുക്കും.

Tuesday, April 10, 2018

നടുമുറ്റം ഫിയസ്റ്റ 2018

ദോഹ: കള്‍ച്ചറല്‍ ഫോറത്തിന് കീഴിലെ വനിതാകൂട്ടായ്മയായ നടുമുറ്റം രണ്ടാം വാര്‍ഷികാഘോഷത്തിന്റെ ഭാഗമായി സംഘടിപ്പിക്കുന്ന 'നടുമുറ്റം ഫിയസ്റ്റ 2018'-ന്റെ ഒരുക്കങ്ങള്‍ പൂര്‍ത്തിയായതായി ഔദ്യോഗിക വൃത്തങ്ങള്‍ അറിയിച്ചു. 

ഏപ്രില്‍ പതിമൂന്നിന് വൈകീട്ട് അഞ്ചിന് അല്‍ ജസീറ അക്കാഡമിയിലാണ് പരിപാടി. പ്രദര്‍ശനം, സാംസ്‌കാരിക സമ്മേളനം, കലാപരിപാടികള്‍ എന്നീ മൂന്ന് സെഷനുകളിലായാണ് പരിപാടികള്‍ അരങ്ങേറുക. വൈകീട്ട് അഞ്ചിന് കേരളത്തിന്റെ രുചിപ്പെരുമ വിളിച്ചറിയിക്കുന്ന ഭക്ഷ്യമേള, കരകൗശല പ്രദര്‍ശനം തുടങ്ങിയവ നടക്കും. 6.30-ന് നടക്കുന്ന സാംസ്‌കാരിക സംഗമത്തില്‍ വെല്‍ഫെയര്‍ പാര്‍ട്ടി കേരള പ്രസിഡന്റ് ഹമീദ് വാണിയമ്പലം, സ്വദേശി പ്രമുഖര്‍, സാമൂഹിക സാംസ്‌കാരികരംഗത്തെ പ്രമുഖര്‍ തുടങ്ങിയവര്‍ സംബന്ധിക്കും. 

വിവധ മേഖലകളില്‍ കഴിവുതെളിയിച്ച വനിതകളെ ചടങ്ങില്‍ ആദരിക്കും. തുടര്‍ന്ന് കേരളത്തിലെ വിവിധ ജില്ലകളിലെ തനത് കാലരൂപങ്ങള്‍ കോര്‍ത്തിണക്കിയുള്ള കലാവിരുന്ന് നടക്കും. ഒപ്പന, സ്‌കിറ്റ്, നാടന്‍പാട്ട്, മോഹനിയാട്ടം, മൈം തുടങ്ങിയ വിവിധ പരിപാടികള്‍ ഒന്നരമണിക്കൂര്‍ നീണ്ടുനില്‍ക്കുന്ന കലാവിരുന്നിന്റെ ഭാഗമായി അരങ്ങിലെത്തും. നടുമുറ്റം ഫിയസ്റ്റ 2018-ന്റെ ഭാഗമായി നടത്തിയ വിവിധ മത്സര വിജയികള്‍ക്കുള്ള സമ്മാനദാനവും ചടങ്ങില്‍ നടക്കുമെന്ന് നടുമുറ്റം ഭാരവാഹികള്‍ അറിയിച്ചു.